Yaakuba ye neemoo duwaa a dinkewolu ye
1 Yaakuba ye a dinkewolu kumandi, a ko ì ye ko:
Ali bee ye beŋ ñoo kaŋ, ŋa naa kuma fo ali ye, meŋ be ke la ali la siniŋ saama.
2 Ali beŋ ñoo kaŋ, ali ye kumoo moyi, alitolu Yaakuba dinkewolu.
Ali lamoyiri ke ali faamaa Isirayila la.
3 Rubeni, ite le mu n diŋ foloo ti,
n semboo, n semboo ye ite le foloo wuluu.
Ñaaboo palaasoo be ite le bulu, aniŋ semboo.
4 I be le komeŋ waamoo, moo te meŋ manankuŋ noo la.
Bari i te tara la ñaaboo palaasoo to kotenke.
Kaatu i ye laañooyaa tuluŋo ke i faamaa la laaraŋo le kaŋ,
i ye n na laaraŋo kosondi.
5 Simeyoni niŋ Lewi, ali baadimmaa fuloo!
Ali la hawusaroolu* le mu fitinoo kelejooraŋolu ti.
6 Allamaa n daa nene kana bula ali la feere sitoolu to.
Allamaa n daa nene kana kafu ali la kafoo kono.
Kabiriŋ ali kamfaata, ali ye moofaa le ke,
ali ye tuuraalu tonkoliŋ fasoolu kuntu tawunteeyaa kono.
7 Dankoo ye laa ali kaŋ ali la kamfaa saŋaroo kamma la,
aniŋ ali la jusu jawuyaa.
Ali koomalankoolu be janjaŋ na Banisirayila,
ì ye tara janjandiŋ a lasili doolu kono.
8 Yahuuda, i faadiŋolu be ke la i tentulaa le ti,
i la noo juloo le be tara la i jawoolu kaŋ,
i faadiŋolu be naa le ka ñoyi i ñaatiliŋo la.
9 Yahuuda, n dinkewo, ite ka muluŋ ne ko jatadiŋo,
meŋ ka i baluu suboo la ka ke sembemaa ti.
I ka i saba le, i ye i tiliŋ ko jatoo,
ko jatamusoo, jumaa le be haañi la ka i maa?
10 Yahuuda niŋ mansayaa te fata la ñoo ma,
a koomalankoolu be tu la maraloo la le,
fo janniŋ maralilaa kuntiyo faŋo be naa la,
meŋ, duniyaa moolu la buuñaa be tara la a ye.
11 Ite Yahuuda, i be i la falimusoo siti la wayini* yiroo le bala,
a diŋo ye tara sitiriŋ wayini yiribuloo bala.
I be i la duŋ feŋo kuu la wayinoo le la,
i ye i la waramboo kuu wayinoo la.
12 I ñaakesoo le be faramansa la ka tambi wayinoo* la,
i ñiŋo le be koyi la ka tambi keekewo la.
13 Sebuluni, ite be sabati la baadaa le la,
daameŋ be ke la tendaa ti kuluŋolu ye.
I la bankoo naanewo be taa le fo Sidoni saatewo maafaŋo la.
14 Isakari, ite be le ko fali sembemaa,
ka i laa dunoo koto.
15 I be a je la wo le to, dahaa diyaa mu meŋ ti,
aniŋ bankoo niiseewoo mu meŋ ti.
I ka i sañoo jimi dunoo le ye,
i keta joŋo le ti ka foriseetoo dookuwo ke.
16 Dani, ite be ke la maralilaa le ti i la moolu ye,
ali be ke la ko Banisirayila lasili koteŋolu.
17 Dani, i be ke la le ko sila batu saa,
sirinka batu saa kunamaa,
ka suwoo kiŋ a tonkoliŋo to,
fo a borindilaa si boyi naŋ a koo la duuma.
18 Yaawe*, m Maarii, m be lamoyiri ke kaŋ i la tankoo le la.
19 Kadu, suŋ koorewolu le be ite boyinkaŋ na,
bari i be ì kele la le, i ye ì bayi.
20 Aseri, neema be ke la i la senebankoo ye,
i la domoroo be ke la mansakee domoroo le ti.
21 Nafutali, i be ke la le ko minaŋo,
meŋ maŋ tara maroo kono,
ka diŋ kendoolu wuluu.
22 Yusufa, ite ka muluŋ ne ko yiri dinnaa,
yiri dinnaa meŋ be woyoo daala.
A buloolu be sele kaŋ sansaŋ baloo la.
23 Kalabeñetiyolu ye i kamfandi le,
ka i buŋ ì la kalabeñoolu la ì la i koŋo kaŋ.
24 Bari i la kaloo tuta bambandiŋ ne,
i buloo tariyaata, a bambanta.
I semboo bota Yaakuba la Sembetii Baa le bulu,
Isirayila Kantalaa, Isirayila la Bere baa.
25 Allamaa n na Alla ye i maakoyi.
Allamaa Alla Tallaa neema la i ma.
A ye neema ke i ye samaajiyo la ka bo santo,
a ye neema ke i ye ka bo duuma.
A ye neema ke i ye musu jiidilaalu la, aniŋ beeyaŋolu.
26 Nte, i faamaa, nte le la neemoo kuliyaata n na moo foloolu ti,
ka tambi konko baalu la.
Yusufa, Allamaa ñiŋ neemoo jii la i kaŋ,
a ye tara i ye, kaatu ite le mu tomboŋ moo ti
i faadiŋolu kono.
27 Benjamini, ite ka muluŋ ne ko suluu saŋaroo,
a ye mutaroo ke soomandaa,
a ye a talaŋ-talaŋ wulaaroo.
28 Ñinnu le mu Banisirayila lasili taŋ niŋ fuloo ti. Ñiŋ ne keta kumakaŋo ti, ì faamaa ye meŋ fo ì ye, kabiriŋ a be neemoo daani la ì ye, ì bee kiliŋ-kiliŋ naa niŋ ì fansuŋ taa taata.
Yaakuba la beloo niŋ a la baadewo
29-30 Bituŋ Yaakuba ye kaŋo dii, a ko ì ye ko, “Sambii nte be kafu la n na moolu kaŋ. Ali m baadee m faamaañolu daala berehuwo kono, meŋ be Makipela kunkoo kono Mamure daala, Kanaani bankoo kaŋ. Iburayima ye ñiŋ berehuwo niŋ kunkoo ñiŋ saŋ Efuroni Hitinkoo ma le ka ke baadeedulaa ti. 31 Ì ye Iburayima baadee ñiŋ dulaa le to, aniŋ a musumaa Saara. Ì ye Isiyaaka fanaa niŋ a la musoo Rebeka baadee jee le to, aduŋ ŋa Leya fanaa baadee jee le to. 32 Kenoo ñiŋ niŋ berehuwo meŋ be a kono, bee santa Hitinkoolu le bulu.”
33 Kabiriŋ Yaakuba pareeta ñiŋ kumakaŋolu dii kaŋ a dinkewolu la, a ye i laa, a niyo jiita, a kafuta a bonsuŋolu ma.
© Mandinka Bible © Bible Society in The Gambia, 2011
