Yaakuba niŋ a la dimbaayaalu bee sawunta Misira
1 Isirayila ye a la sotofeŋolu bee kafu ñoo ma, a ye a la taamasiloo dati. Kabiriŋ a futata Beeriseba saatewo ma, a ye beeyaŋ sadaalu* bo a faamaa Isiyaaka la Alla ye jee. 2 Alla diyaamuta Isirayila ye jeroo kono suutoo, a ko a ye ko, “Yaakuba, Yaakuba.” Bituŋ Yaakuba ko a ye ko, “M fele jaŋ.” 3 Bituŋ Alla ko a ye ko, “Nte le mu Alla ti, i faamaa la Alla. Kana sila ka taa Misira, kaatu m be i ke la banku sembemaa baa le ti jee. 4 Nte faŋo le niŋ i be taa ñoo la Misira, aduŋ nte le fanaa be i murundi la naŋ kotenke. Niŋ i beleta, Yusufa le be i ñaalu tawuŋ na.”
5 Bituŋ Yaakuba tententa a la taamasiloo ñiŋ na ka bo Beeriseba. A dinkewolu ye a sindi sareetoo kaŋ, aniŋ ì diŋolu niŋ ì la musoolu, Firawoona ye sareetoolu mennu kii ì kamma. 6-7 Ì ye ì la beeyaŋolu bee taa aniŋ ì la sotofeŋolu bee, ì ye mennu soto Kanaani bankoo kaŋ, ì naata Misira. Yaakuba ye a la dimbaayaalu bee le samba ñoo la, a dinkewolu niŋ a dimmusoolu, a mamariŋolu, kewolu niŋ musoolu.
Yaakuba koomalankoolu mennu naata Misira
8 Ñinnu le mu Banisirayilankoolu toolu ti, Yaakuba niŋ a dinkewolu mennu naata Misira:
Rubeni, ate le mu Yaakuba diŋ foloo ti. 9 Rubeni dinkewolu, wolu le mu Hanoki ti, Pallu, Hesironi aniŋ Karimi. 10 Simeyoni dinkewolu, wolu le mu Yemuweli ti, Yamini, Ohadi, Yakini, Sohari aniŋ Sawuli, Kanaaninka musoo dinkewo. 11 Lewi dinkewolu, wo le mu Kerisoni ti, Kohati aniŋ Merari. 12 Yahuuda dinkewolu, wolu le mu Sela ti, Peresi aniŋ Sera. Yahuuda dinkee doolu, Eri aniŋ Onani, wolu faata Kanaani bankoo le kaŋ. Peresi dinkewolu, wolu le mu Hesironi ti, aniŋ Hamuli. 13 Isakari dinkewolu, wolu le mu Tola ti, Puwa, Yasubu aniŋ Simuroni. 14 Sebuluni dinkewolu, wolu le mu Seredi ti, Eloni aniŋ Yaleeli. 15 Ñinnu le mu dinkewolu ti, Leya ye mennu wuluu Yaakuba la Padani-Aramu, aniŋ dimmusu kiliŋ, Dina. Ì bee kafoo ñoo ma, musu kee, moo taŋ saba niŋ saba.
16 Kadu dinkewolu, wolu le mu Sefoni ti, Haki, Suni, Esiboni, Eri, Arodi aniŋ Areli. 17 Aseri dinkewolu, wolu le mu Imuna ti, Isiwa, Isiwi, Beriya, aniŋ dimmusu kiliŋ, Sera. Beriya dinkewolu mu Heberi le ti, aniŋ Malikiyeli. 18 Ñiŋ moo taŋ niŋ wooroo, Yaakuba ye wolu le soto Silipa la, Labani ye joŋ sunkutoo meŋ dii a dimmusoo Leya la.
19 Yaakuba ye dinkewolu mennu soto a la musoo Raheli la, wolu le mu Yusufa ti, aniŋ Benjamini. 20 Yusufa ye dinkee fula le soto Misira, Manase aniŋ Efurayimu*. A ye ì wuluu Asenati le la, Potifera, Oni saatewo piriisoo*, dimmusoo. 21 Benjamini dinkewolu, wolu le mu Bela ti, Bekeri, Asibeli, Kera, Naamani, Ehi, Rosi, Mupimu, Hupimu aniŋ Aridi. 22 Ñiŋ moo taŋ niŋ naanoo le mu Yaakuba koomalankoolu ti Raheli la karoo la.
23 Dani dinkewo, wo le mu Husimu ti. 24 Nafutali dinkewolu, wolu le mu Yasiyeli ti, Kuni, Yeseri aniŋ Sillemu. 25 Ñiŋ moo woorowuloo le mu Yaakuba koomalankoolu ti ka bo Biliha la, Labani ye joŋ sunkutoo meŋ dii a dimmusoo Raheli la.
26 Yaakuba koomalankoolu mennu naata Misira, bee kafoo ñoo ma, mu moo taŋ wooro niŋ wooro le ti, a dinkewolu la musoolu daa boriŋo jee. 27 Yusufa ye dinkewolu mennu wuluu Misira mu moo fula le ti. Wo kamma la Yaakuba la dimbaayaa bee kafoo ñoo ma, mennu naata Misira, mu moo taŋ woorowula le ti.
Yaakuba ye Yusufa je kotenke
28 Yaakuba ye Yahuuda kii ñaato Yusufa kaŋ, ka siloo yitandi a la ka taa Koseni. Kabiriŋ ì futata Koseni tundoo kaŋ, 29 Yusufa ye a la sareetoo parendi, a taata Koseni ka a faamaa Isirayila benduŋ jee. Kabiriŋ a ye a faamaa je, a ye i miniŋ a la, a kumboota fo waati jaŋ. 30 Isirayila ko Yusufa ye ko, “N si faa noo le saayiŋ, baawo m faŋo le ñaa ye a je ko, hani saayiŋ i be baluuriŋ ne.”
31 Yusufa ko a faadiŋolu ye, aniŋ a faamaa la dimbaayaa toomaalu bee ye ko, “M be taa ka ali la kuwo fo Firawoona ye ko, m faadiŋolu niŋ m faamaa la dimbaayaa toomaalu bee naata n kaŋ ne ka bo naŋ Kanaani bankoo kaŋ. 32 Kantarilaalu le mu ì ti, ì ka tara beeyaŋolu le kunna. Ì ye ì la saajiyolu, baalu niŋ ninsoolu samba naŋ ne, aniŋ ì la sotofeŋolu bee. 33 Niŋ Firawoona ye ali kumandi, a ko ali ye ko, ‘Muŋ ne mu ali la dookuwo ti?’ 34 ali si a fo a ye ko, ‘I la joŋolu, ntolu mu beeyaŋ kantalaalu le ti, ka bo ǹ na fondinkeeyaa waatoo la ka naa bula fo saayiŋ na ko ǹ na alifaa foloolu,’ fo a si ali bula ali ye sii Koseni tundoo kaŋ, kaatu Misirankoolu ka jutu kantarilaalu la le.”
© Mandinka Bible © Bible Society in The Gambia, 2011
