Misira be labaŋ na le ko Asiriya
1 Sanji taŋ niŋ kiliŋo kari sabanjaŋo tili foloo la, Yaawe* la kumoo naata n kaŋ ko: 2 “Ite hadamadiŋo, kiilaariyaa kumoo fo Firawoona ma Misira mansakewo a niŋ a la jamaa moolu ye ko:
Fo ite niŋ jumaa le si laa noo semboo la?
3 A fele, m be i misaali la le ko Libanooni sedari* yiroo
meŋ buloolu niŋ a jamboolu ñiiñaata,
ì ñukuñukuta ka dubeŋo dii sutoo kono,
a suŋo jaŋayaata santo,
fo a turoo be naa minaayoolu maa la.
4 Jiyo meŋ be siyaariŋ a suŋo koto le ye a ñiiñandi.
Duuma jiyo le ye a tinna a jaŋayaata.
Baawo jiyo le ka woyi dulaa bee to, sutoo kono jee,
aniŋ wo woyoolu le ka bori yiri juwolu bee koto,
sutoo kono jee.
5 Wo le ye a tinna
a jaŋayaata ka tambi yiroolu bee la,
wuloo kono.
A buloolu ka wara le, ì ye jamfa.
Jiyo meŋ be a suŋo koto
le ka a biirendi wo ñaama.
6 Kunoolu mennu bee ka tii santo
ka ì la ñaŋolu laa ate le kaŋ.
Wulakono daafeŋolu bee
ka wuluu a suŋo le koto,
duniyaa banku moolu bee
ka tara a dubeŋo le koto.
7 A suŋo la waroo niŋ a buloolu la jaŋayaa le ye a ñiiñandi baake.
Kaatu a suloolu dunta le fo duuma,
ì taata fo duuma jii woyoolu kono.
8 Hani sedari yiroolu mennu be Alla la naakoo kono
niŋ a te laa noo la.
A niŋ junipa yiroolu buloolu faŋolu te laa noo la.
Hani arimoni yiribuloolu faŋolu la ñiiñaa maŋ a sii.
Yiri te Alla la naakoo kono
a niŋ meŋ si muluŋ.
9 Nte le ye a dadaa ka a ñiiñandi wo ñaama
ka jamfa santo ka tambi yiroolu bee la
mennu be nte Alla faŋo la naakoo kono.
Yiroolu mennu bee be Edeni naakoo kono
ñaa bota a fee le.”
10 Maarii Yaawe ye ñiŋ ne fo ko: “A buloolu jaŋayaata le fo a be naa futa la minaayoolu ma. Wo le ye a tinna a ka kibiri, aniŋ a ka a faŋ wara. 11 Wo kamma la m be a duŋ na maralilaa doo le bulu, wo bulu ye sii a la kendeke ko a la kuu jawoolu be ñaameŋ, nte faŋo le ye a bayi jee a la kuu jawoo kamma la. 12 Bantala banku* jawu baalu la kelediŋolu le ye a suŋo kuntu, ì ye a fili jaariŋ konkoolu kaŋ aniŋ wulumbaŋolu kono. A buloolu ye tara katiŋ-katindiŋ jiibuloolu kono taariŋ. Duniyaa moolu bee be bo la a dubeŋo koto le. 13 Kunoolu mennu bee ka tii be loo la a yiribulu boyiriŋo kaŋ ne, aniŋ wulakono daafeŋolu bee ye tara a buloolu niŋ a jamboolu koto. 14 Wo kamma la, yiroolu mennu bee falinta jii daala, a ye wolu bali le ka jaŋayaa waraŋ ka ì buloolu fayi ka jamfa fo ka sutiyaa minaayoolu ma. Kaatu saayaa le be ì ñaato ka taa kaburoo kono, ka taa kafu doolu ma mennu faata ì ñaa, ì be kaburoo le kono.”
15 Maarii Yaawe ye ñiŋ ne fo ko: “Niŋ a taata laakira, m be sunu baa le laa la a wo jiibuloolu kaŋ, ŋa a wo jiiñaalu suki. Wo jiibuloolu mennu ka bori, ŋa ì bee londi ì kana bori kotenke. Ŋa Libanooninkoolu muuri niŋ niikuyaa la. Wo yiroolu mennu bee be wuloo kono be noro la le, ì la kuwo kamma. 16 M be kijafara baa le laa la bankoolu kaŋ, ka bo niŋ a boyi kaŋo la, niŋ ŋa a fayi duuma, ka taa laakira, aniŋ moo doolu mennu taata a ñaa kaburoo kono. Aduŋ Edeni naakoo kono yiri ñiimaalu bee, mennu mu Libanooni yiri betoolu ti, woyoo daala yiroolu bee, ì ye mennu jiiboŋ kendeke, a be ke la wolu ye jusu ñaburaŋo le ti, laakira jee. 17 Wolu mennu bee be a dubeŋo koto nuŋ aniŋ a deŋñoolu mennu be duniyaa kono, ì niŋ a taata ñoo la kaburoo kono le ka kafu wo doolu la mennu faata keloo kono.
18 “Ñiŋ yiroo mu ite Firawoona niŋ i la jamaa moolu bee le ti. Yiri nene maŋ soto Edeni naakoo kono meŋ na horomoo warata ko ite. Bari i be boyi la le i ye faa, i ye taa bankoo koto duuma, i niŋ wo Alla lombaloolu be tara la laariŋ dulaa kiliŋ ne laakira, i niŋ moolu mennu foloo faata keloo kono i ñaa.” Maarii Yaawe le ye a fo.
© Mandinka Bible © Bible Society in The Gambia, 2011
