1 Bituŋ Yaawe* ko Musa ye ko, “A juubee, m be i ke la Firawoona ye le ko Alla, aduŋ i kotoomaa Haaruna si ke i la annabiyomoo ti. 2 Ŋa i yaamari feŋ-wo-feŋ na, i ñanta a fo la le, aduŋ i kotoomaa Haaruna le be a fo la Firawoona ye, a ye Banisirayilankoolu bula, ì ye finti a la bankoo kaŋ. 3-4 Bari m be mansa sondomoo jandi la le. A te i lamoyi la ali la, hani niŋ a ye a tara, ŋa taamanseeroolu niŋ kaawakuu jamaa ke Misira. N si naa yankankati jawoo laa Misira kaŋ, niŋ ŋa n na kafoolu Banisirayilankoolu fintindi bankoo kaŋ. 5 Aduŋ Misirankoolu be a loŋ na le ko, nte le mu Yaawe ti, niŋ ŋa n semboo yitandi ì la, ka Banisirayilankoolu fintindi jee.”
6 Yaawe ye Musa niŋ Haaruna yaamari meŋ na, ì ye wo le ke. 7 Musa be nuŋ sanji taŋ seyi le, Haaruna be sanji taŋ seyi niŋ saba, kabiriŋ ì ka diyaamu Firawoona ye.
Haaruna la doko kaawakuuyaariŋo
8 Yaawe ko Musa niŋ Haaruna ye ko, 9 “Niŋ Firawoona ko ali ye ko, ali kaawakuwo ke, i si a fo Haaruna ye ko, a ye a la dokoo taa, a ye a fayi Firawoona ñaatiliŋo la, aduŋ a be ke la saa le ti.”
10 Wo to le Musa niŋ Haaruna taata Firawoona yaa, ì ye Yaawe la yaamaroo ke, ko a ye a fo ì ye ñaameŋ. Haaruna ye a la dokoo fayi Firawoona niŋ a la ñaatonkoolu ñaatiliŋo la, a yelemata saa baa ti. 11 Firawoona ye a la moo ñaamendiŋolu niŋ batuutaatiyolu kumandi, aduŋ Misira batuutaalu fanaa ye wo kuu kiliŋo le ke ì la kulloo semboolu la. 12 Moo-wo-moo ye a la dokoo fayi, a ka yelema saa baa le ti, bari Haaruna la dokoo le ka ì la dokoolu bee kunuŋ. 13 Hani wo Firawoona sondomoo jaata le, aduŋ a maŋ i lamoyi ì la, ko Yaawe ye a fo nuŋ ñaameŋ.
Mantoora foloo: Jiyo yelemata yeloo ti
14 Wo to le Yaawe ko Musa ye ko, “Firawoona sondomoo jaata le, a balanta le moolu ye taa. 15 Taa Firawoona yaa soomandaa, niŋ a ka taa baa to. A batu Nayili Boloŋo daala, ka a benduŋ. I ye i la dokoo meŋ yelemata saa ti, samba ñoo la. 16 A fo a ye ko, ‘Yaawe Hiburunkoolu* la Alla le ye n kii, ka a fo i ye ko, “N na moolu bula ì ye taa, fo ì si m batu keñewuloo* kono.” Bari hani saayiŋ i maŋ soŋ. 17 Yaawe ye ñiŋ ne fo ñiŋ kuwo to ko, i be a loŋ na le ko, ate le mu Yaawe ti. Ñiŋ dokoo meŋ be m bulu teŋ, m be baajiyo lipa la a la, aduŋ a be yelema la yeloo ti. 18 Ñewolu mennu be Nayili Boloŋo kono, be faa la le. Baajiyo be sunkaŋ na le, aduŋ Misirankoolu te a jiyo miŋ noo la.’ ”
19 Yaawe ko Musa ye ko, “A fo Haaruna ye, a ye a la dokoo taa, a ye a buloo coodi Misira jiyolu kunto, boloŋolu, jiisiloolu, daloolu, aniŋ jii dulaalu bee, aduŋ ì be yelema la yeloo le ti. Yeloo be tara la daa-wo-daa le Misira, hani jiipaanoolu aniŋ jiibindaalu kono.”
20 Yaawe ye Musa niŋ Haaruna yaamari meŋ na, ì ye wo le ke. Haaruna ye a la dokoo wulindi Firawoona niŋ a la ñaatonkoolu ñaa la. A ye Nayili Boloŋo jiyo lipa, aduŋ jiyo bee yelemata yeloo ti. 21 Ñewolu mennu be Nayili Boloŋo kono faata, baajiyo sunkanta, fo Misirankoolu buka i miŋ noo a jiyo la. Yeloo tarata Misira dulaalu bee le to. 22 Bari Misirankoolu la batuutaalu ye wo kuu kiliŋo le ke ì la batuutaayaa kono. Firawoona sondomoo naata jaa kuu, a balanta Musa niŋ Haaruna la kumoo moyi la, ko Yaawe ye a fo nuŋ ñaameŋ. 23 A ye a koo dii le, a taata a la mansabuŋo kono, a maŋ a kuwo muta feŋ ti. 24 Misirankoolu bee ye jiyo siŋ Nayili Boloŋo daa le la, fo ì si miŋ jiyo soto, kaatu ì maŋ baajiyo miŋ noo.
25 Yaawe ye baajiyo tu wo ñaama le fo tili woorowula.
© Mandinka Bible © Bible Society in The Gambia, 2011
