Alla ye Musa kumandi
1 Saayiŋ, Musa ka a bitankewo Yetiro meŋ keta Midiyani piriisoo* ti, la saajiyolu niŋ baalu le kanta. A niŋ ì ka taa le fo keñewuloo* kara doo la, ka taa fo Horebu to, meŋ mu Alla la konkoo ti. 2 Jee to Yaawe* la malaayikoo fintita a kaŋ niŋ dimbaa la ka bo yirindiŋo bala. Musa ye a je ko, dimbaa ye yirindiŋo mala le, bari a maŋ a jani. 3 Wo to le Musa kumata ko, “M be taa le, ŋa taa ñiŋ kaawakuwo juubee, meŋ ye a tinna, ñiŋ yirindiŋo maŋ jani.”
4 Kabiriŋ Yaawe ye a je ko, a taata le ka a juubee, a ye a kumandi ka bo naŋ yirindiŋo kono, “Musa! Musa!” Aduŋ Musa ko, “M fele jaŋ.” 5 Alla ko, “Kana kata naŋ kotenke. I la samatoolu bondi, kaatu i be looriŋ dulaa meŋ to, dulaa senuŋo le mu.” 6 Bituŋ a ko, “Nte le mu i mumuñolu la Alla ti, Iburayima la Alla, Isiyaaka la Alla, aniŋ Yaakuba la Alla.” Biriŋ wo to, Musa ye a ñaadaa muuri, kaatu a silata le, ka Alla juubee.
7 Yaawe ko, “Ŋa n na moolu la bataa kuwo je le, ì be meŋ kono Misira. Ŋa ì kumboo kaŋo moyi le, kaatu ì la dookuu kuntiyolu le ye ì mantoora, ì la bataa ye n dewuŋ ne. 8 Saayiŋ n naata le, ka ì tankandi Misirankoolu bulu, aniŋ ka ì bondi wo bankoo kaŋ, ka ì samba banku warariŋ baa to, keekewo niŋ liyo ka woyi daameŋ, Kanaaninkoolu, Hitinkoolu, Amorinkoolu, Perisinkoolu, Hiwinkoolu aniŋ Yebusinkoolu be sabatiriŋ daameŋ. 9 Banisirayilankoolu la kumboo futata n na le saayiŋ, aduŋ ŋa a je le, Misirankoolu ka ì mantoora ñaameŋ. 10 Saayiŋ taa. M be i kii la Firawoona le kaŋ, fo i si n na moolu, Banisirayilankoolu, bondi naŋ Misira.”
11 Musa ko Alla ye ko, “Nte mu jumaa le ti, fo n si taa Firawoona yaa, ka Banisirayilankoolu bondi naŋ Misira?”
12 Bari Alla ko, “M be tara la i fee le. Ñiŋ ne be ke la i ye taamanseeroo ti ko, nte le ye i kii. Niŋ i ye moolu bondi naŋ Misira, ali be nte batu la ñiŋ konkoo le santo.”
Alla ye a too lankenemayandi Musa ye
13 Musa naata a jaabi ko, “Niŋ n taata Banisirayilankoolu yaa n ko, ‘Ali bonsuŋolu la Alla le ye n kii ali kaŋ’, ì be n ñininkaa la le, ‘A too ndii?’ Bituŋ m be muŋ ne fo la ì ye?”
14 Alla ko Musa ye ko, “M mu meŋ ti, m mu wo le ti. I be ñiŋ ne fo la Banisirayilankoolu ye, ‘M mu meŋ ti, wo le ye n kii ali kaŋ.’ ” 15 Alla ko Musa ye fanaa ko, “A fo Banisirayilankoolu ye ko, ‘Yaawe* ali mumuñolu la Alla, Iburayima la Alla, Isiyaaka la Alla, aniŋ Yaakuba la Alla le ye n kii ali kaŋ.’ Ñiŋ ne mu n too ti fo abadaa, too meŋ ali hakiloo ñanta bula la a la jamaani-wo-jamaani. 16 Taa, i ye taa Banisirayila alifaalu bendi, i ye a fo ì ye ko, ‘Yaawe ali bonsuŋolu la Alla, Iburayima la Alla, Isiyaaka la Alla, aniŋ Yaakuba la Alla le fintita n kaŋ, aduŋ a ko, a ye ali la kuwo hakilitu le, aduŋ a ye a je le, kuwolu mennu bee ka ke ali la Misira. 17 Aduŋ a ye ali laahidi le ka ali bondi mantooroo kono Misira, ka ali dundi Kanaaninkoolu, Hitinkoolu, Amorinkoolu, Perisinkoolu, Hiwinkoolu, aniŋ Yebusinkoolu la bankoo kaŋ, keekewo niŋ liyo ka woyi daameŋ.’
18 “Banisirayila alifaalu be i lamoyi la i la le. Bituŋ ite niŋ alifaalu si taa Misira mansa yaa, ka a fo a ye ko, ‘Yaawe, Hiburunkoolu* la Alla, niŋ m̀ benta le. A ye ñiŋ ne fo ko, m̀ bula, ŋà tili saba taamoo ke keñewuloo kono, ka sadaalu* bo Yaawe ǹ na Alla ye.’ 19 Ŋa a loŋ ne ko, Misira mansa te soŋ na ali ye taa, fo niŋ sembe baa laata a kaŋ. 20 Bari m be n semboo yitandi la le, ka Misirankoolu mantoora ka kaawakuwolu ke jee. Niŋ wo keta, a be ali bula la le ali ye taa.
21 “M be a ke la le, ñiŋ moolu niŋ Misirankoolu la kuwolu ye soo ñoo kaŋ, i si a je, niŋ ali be bo la jee, ali bulu kenseŋo te finti la. 22 Banisirayila musoolu be taa ì siiñoo Misirankoolu yaa le, aniŋ Misira musoolu mennu be ì la buŋolu kono. Ì be ì ñininkaa la feetoofatoo la, sanoo aniŋ kodiforo ñaroolu, aduŋ ali be wolu le ke la ali dinkewolu niŋ ali dimmusoolu bala. Ali be Misirankoolu la feŋolu samba la wo le ñaama.”
© Mandinka Bible © Bible Society in The Gambia, 2011
