A Glimpse – The Gambia

Haaruna niŋ a dinkewolu la tolooroo piriisiyaa dookuwo kamma

1 Yaawe* ko Musa ye ko:

I ñanta ñiŋ ne ke la Haaruna niŋ a dinkewolu ye, ka ì seneyandi, fo ì si piriisiyaa* dookuwo ke n ye. I si ninsituuraa kiliŋ taa, aniŋ saakotoŋ fula, mennu maŋ sootaari soto. 2 I si mbuuru leweñintaŋ siifaa saba jani, foloo ka bo niŋ fariña betoo la, doo meŋ ñaamita niŋ tuloo la, aniŋ doo meŋ dampatanta, i ye tuloo ke meŋ kaŋ. 3 I si ì ke sinsiŋo kono, i ye ì bondi n ye, niŋ i be ninsituuraa niŋ saakotoŋolu ke la n ye sadaa* ti. 4 Bituŋ i si Haaruna niŋ a dinkewolu samba, ì ye loo Bendulaa Tiriliisoo dundaŋ daa to, i ye ì kuu niŋ jiyo la. 5 I si duŋ feŋolu taa, i ye ì duŋ Haaruna la, simisoo meŋ jaŋayaata, efodoo* kotondaŋ dendikoo, efodoo faŋo aniŋ a jifa sisilaa. I si efodoo siti niŋ a la teesitiraŋ sooriŋo la. 6 I si naawoo miniŋ a kuŋo bala. I si ñara senuŋo siti a bala. 7 I si tulu senuŋo* taa, i ye a boŋ a kuŋo kaŋ ka a la tombondiroo yitandi. 8-9 I si a dinkewolu samba naŋ, i ye simisi jaŋolu niŋ naafoolu duŋ ì la. Bituŋ i si teesitiraŋo siti Haaruna niŋ a dinkewolu la. Piriisiyaa be tara la ì la dimbaayaa le kono fo abadaa. I ñanta Haaruna niŋ a dinkewolu toloo la teŋ ne.

10 I si ninsituuraa ñiŋ naati Bendulaa Tiriliisoo ñaatiliŋo la, aduŋ Haaruna niŋ a dinkewolu si ì buloolu laa a kuŋo kaŋ. 11 I si a kanateyi n ñaatiliŋo la Bendulaa Tiriliisoo dundaŋ daa to. 12 I si ninsituuraa ñiŋ yeloo doo taa, i ye i bulukondiŋo bula a kono, i ye a maa sadaajanidulaa* bina muluŋolu bala, meŋ too tuta, i ye a boŋ sadaajanidulaa duumoo to. 13 Bituŋ i si naa keŋo bondi, meŋ be konokono feŋolu bala, jusoo dulaa betoo, aniŋ kookili fuloo, keŋo be mennu bala. I si ì jani wo ñaama sadaajanidulaa kaŋ, ka a ke n ye sadaa ti. 14 Bari i si ninsituuraa ñiŋ suboo, kuloo, aniŋ a nuwolu jani daakaa dulaa banta la. Ñiŋ ne mu junube kafarilaŋ sadaa ti.

15 I si saakotoŋ kiliŋ taa, aduŋ Haaruna aniŋ a dinkewolu le ñanta ì buloolu laa la a kuŋo kaŋ. 16 A kanateyi, i ye a yeloo sari sadaajanidulaa karadandaŋolu bee la. 17 I si saakotoŋ suboo kuntuŋ-kuntuŋ, i ye a konokono feŋolu kuu, aniŋ a kooma siŋolu, i ye ì landi kuŋo kaŋ aniŋ wo kunturu doolu. 18 Bituŋ i si saakotoŋ muumewo jani sadaajanidulaa kaŋ. A keta nte Yaawe ye jani sadaa le ti. Kaatu sadaa meŋ keta n ye niŋ dimbaa la, seera diimaa ka n seewondi le.

19 Saakotoŋ doo taa, aduŋ Haaruna niŋ a dinkewolu le ñanta ì buloolu laa la a kuŋo kaŋ. 20 A kanateyi, i ye a yeloo doo taa, i ye a ke Haaruna niŋ a dinkewolu bulubaa tuluneŋolu bala, ì bulubaa bulukumbaalu bala, aniŋ ì bulubaa sinkumbaalu. Bituŋ i si yeloo sari sadaajanidulaa karadandaŋolu bee la. 21 I si yeloo doo taa, meŋ be sadaajanidulaa bala, aniŋ tulu senuŋo, i ye a sari Haaruna niŋ a la duŋ feŋolu, aniŋ a dinkewolu niŋ ì la duŋ feŋolu kaŋ. Ate niŋ a dinkewolu niŋ ì la duŋ feŋolu bee be seneyaa la m fee le. 22 I si keŋo taa ñiŋ saakotoŋo bala, feñetuŋo niŋ a keŋo, keŋo meŋ be konokono feŋolu bala, jusoo dulaa betoo, kookili fuloo, keŋo ye tara ì bala, aniŋ a bulubaa wutoo. Ñiŋ mu toloori saakotoŋo le ti. 23 I si mbuuru siifaa-wo-siifaa kuŋ kiliŋ bondi, ka bo mbuuru leweñintaŋ sinsiŋo kono meŋ keta n ye sadaa ti, kuŋ kiliŋ meŋ janita niŋ fariña betoo la, doo meŋ ñaamita niŋ tuloo la, aniŋ doo meŋ dampatanta. 24 I si ñiŋ bee duŋ Haaruna niŋ a dinkewolu buloo kono, ì ye ì teeka nte Yaawe ñaatiliŋo la, a ye ke teekandiri sadaa ti. 25 Bituŋ i si ì taa ì bulu, i ye ì niŋ jani sadaa jani sadaajanidulaa kaŋ, kaatu sadaa meŋ keta n ye niŋ dimbaa la, wo seera diimaa ka n seewondi le.

26 Niŋ wo keta, i si naa saakotoŋo sisoo taa Haaruna la tolooroo kamma, i ye a teeka nte Yaawe ñaatiliŋo la ka a ke teekandiri sadaa ti, bituŋ a si ke i taa ti. 27 I si toloori saakotoŋo kara doolu seneyandi, mennu keta Haaruna niŋ a dinkewolu taa ti. Wolu le mu sisoo ti, i ye meŋ wulindi, aniŋ i ye wutoo meŋ dii. 28 Ñiŋ mu n na luwaa le ti, meŋ ñanta muta la waati-wo-waati, niŋ n na moolu ka ì la kayira sabatindiraŋ sadaa bondi: Beeyaŋo sisoo niŋ a wutoo mu Haaruna niŋ a koomalankoolu le taa ti. Ñiŋ ne ka ke moolu la soorifeŋo ti nte Yaawe ye.

29 Haaruna la ñiŋ duŋ feŋ senuŋolu be ke la a koomalankoolu le taa ti. Ì be ñiŋ duŋ feŋolu le duŋ na, niŋ ì be ì toloo la. 30 A dinkewo meŋ ye a keetaa piriisiyaa dookuwo to, aduŋ a naata Bendulaa Tiriliisoo to, ka dookuwo ke dulaa senuŋo to, ñanta ì duŋ na le fo tili woorowula.

31 I si toloori saakotoŋo suboo taa, i ye a fajindi dulaa to, meŋ seneyaata. 32 Haaruna niŋ a dinkewolu le ñanta a niŋ mbuuroo meŋ too tuta sinsiŋo kono, domo la Bendulaa Tiriliisoo dundaŋ daa to. 33 Ì ñanta ñiŋ sadaalu domo la le, kaatu a keta ì ye ì la tolooroo niŋ ì la seneyandiroo junube kafarilaŋ sadaa le ti. Bari moo-wo-moo meŋ maŋ ke piriisoo* ti, maŋ ñaŋ na ì domo la, kaatu ì seneyaata le. 34 Niŋ a ye a tara tolooroo saakotoŋ suboo too tuta, waraŋ mbuuroo fo soomandaa, i si a jani. A maŋ ñaŋ na domo la, kaatu a seneyaata le.

35 Ŋa i yaamari feŋ-wo-feŋ na, a bee ke Haaruna niŋ a dinkewolu ye, ka ì toloo tili woorowula kono. 36 Luŋ-wo-luŋ i ñanta ninsituuraa le bondi la sadaa ti, fo junuboolu si kafari. Ñiŋ ne be sadaajanidulaa seneyandi la. Bituŋ i si naa tulu senuŋo boŋ a kaŋ ka ke dulaa senuŋo ti. 37 I si ñiŋ ke fo tili woorowula. Bituŋ sadaajanidulaa muumee bee si ke dulaa senuŋo ti, aduŋ moo-wo-moo waraŋ feŋ-wo-feŋ maata a la, a la seneyaa be sele la a la le.

Luŋ-wo-luŋ sadaalu

(4 Musa 28:1-8)

38 Luŋ-wo-luŋ i ñanta ñiŋ ne bo la sadaa ti sadaajanidulaa kaŋ, saajiiriŋ fula mennu siyo be sanji kiliŋ. 39 I si doo bondi soomandaa, doo fitiri maafaŋo. 40 Niŋ i be saajiiriŋ foloo bondi la, i be fariña kilo kiliŋ ne taa la, i ye meŋ niŋ olifu* tulu betoo ñaami ka a ke siimaŋ sadaa ti. I si wayini* liitari kiliŋ boŋ, ka a ke miŋ feŋ sadaa ti. 41 I si saajiiriŋ doo bondi fitiri maafaŋo la, aniŋ wo siimaŋ sadaa kiliŋo, aniŋ miŋ feŋ sadaa meŋ, i ye a bondi soomandaa. Kaatu sadaa meŋ keta n ye niŋ dimbaa la, seera diimaa ka n seewondi le. 42 Alitolu niŋ jamaanoolu mennu be naa la, ñanta ñiŋ jani sadaa ke la a ñaama le Bendulaa Tiriliisoo dundaŋ daa to nte Yaawe ñaatiliŋo la. M be ali tara la wo le to ka diyaamu ali ye. 43 N niŋ Banisirayilankoolu be beŋ na jee le to, aduŋ n na semboo niŋ waroo le be wo dulaa seneyandi la. 44 Wo ñaama le m be Bendulaa Tiriliisoo seneyandi la, sadaajanidulaa, aniŋ fanaa m be Haaruna niŋ a dinkewolu seneyandi la, ka piriisiyaa dookuwo ke n ye. 45 Bituŋ n si naa sabati Banisirayilankoolu fee, ŋa ke ì la Alla ti. 46 Ì be a loŋ na le ko, nte le mu Yaawe ti, ì la Alla meŋ ye ì bondi naŋ Misira bankoo kaŋ, fo n si sabati ì fee. Nte le mu Yaawe ti, ì la Alla.

2 Musa 29