Sadaajanidulaa
(2 Musa 38:1-7)1 Yaawe* ko Musa ye ko:
Ali sadaajanidulaa* dadaa ka bo niŋ baransaŋ yiroo la. A ñanta ke la tonkoŋ naanoo le ti. A karoo niŋ a fanoo si ke nonkonkatiñaa luulu ti, a loo nonkonkatiñaa saba. 2 Ali si bina muluŋolu dadaa, ali ye ì ke tonkoŋ naanoo ñiŋ bee santo, ì niŋ sadaajanidulaa ñanta tara la ñoo bala le. A bee ñanta muuri la jaawaloo le la. 3 Ali si a jooraŋolu bee dadaa niŋ jaawaloo la, a seebuutu bondiraŋolu, a keraŋolu ka seebuutoolu samba, a booloolu, subusooraŋolu, aniŋ dimbaa biiraŋolu. 4 Ali si jaawali kiriyaasoo dadaa, ali ye jaawali bularaŋolu ke a tonkoŋ naanoo bala. 5 Ali si kiriyaasoo ke sadaajanidulaa daa koto, fo a si tara sadaajanidulaa teema maafaŋo la. 6 Ali si a sambaraŋ dokoolu dadaa niŋ baransaŋ yiroo la, aduŋ wolu si muuri niŋ jaawaloo la, 7 ali ye ì dundi bularaŋolu kono sadaajanidulaa karadandaŋ fuloo la, niŋ ali be a samba la. 8 Ali si sadaajanidulaa dadaa ka bo niŋ baransaŋ yiroolu la, aduŋ ali ye a koloŋ kenseŋo londi ko ŋa misaaloo meŋ yitandi i la konkoo kaŋ.
Tiriliisi Senuŋo luu sansaŋo
(2 Musa 38:9-20)9 Ali si sansaŋo dadaa tiriliisoo karoo bee ye. A bulubaa karoo ñanta ke la nonkonkatiñaa keme le ti. A ridoolu ñanta ke la perekaanoo le ti. 10 A ñanta jaawali samasiŋ muwaŋ ne soto la, aniŋ jaawali looraŋ muwaŋ samasiŋolu ye. A sitiraŋolu niŋ a dendaŋ dokoolu ñanta dadaa la niŋ kodiforoo le la. 11 A maraa karoo fanaa ñanta ke la nonkonkatiñaa keme le ti. Aduŋ a ñanta ridoolu soto la le, aniŋ samasiŋ muwaŋ niŋ jaawali looraŋ muwaŋ. A sitiraŋolu niŋ a dendaŋ dokoolu fanaa ñanta dadaa la niŋ kodiforoo le la. 12 A tilijii karoo la, ridoolu karoo ñanta ke la nonkonkatiñaa taŋ luulu le ti, jaawali samasiŋ taŋ aniŋ jaawali looraŋ taŋ ne ñanta tara la jee. 13 A tilibo karoo la, dundaŋ daa be daameŋ, a sansaŋo fanoo fanaa ñanta ke la nonkonkatiñaa taŋ luulu le ti. 14 Aduŋ dundaŋ daa kara doo la, ridoo meŋ na jamfoo mu nonkonkatiñaa taŋ niŋ luulu ti le ñanta tara la jee, samasiŋ saba aniŋ looraŋ saba. 15 Kara doo la fanaa, ridoo nonkonkatiñaa taŋ niŋ luulu le ñanta tara la jee, samasiŋ saba aniŋ looraŋ saba. 16 Dundaŋ daa faŋo ridoo ñanta ke la nonkonkatiñaa muwaŋ ne ti. A ñanta daa la niŋ juluboora buluuriŋo, wuluyeloo, wuleeriŋo aniŋ koyimaa le la. Ali ye a ñiiñandi niŋ sooroo la. Samasiŋ naani le ñanta tara la a bala, a duuma ye looraŋ naani soto. 17 Samasiŋolu mennu bee be sansaŋo karoolu bee la, ñanta kodiforo dendaŋ dokoolu le soto la, aduŋ ì sitiraŋolu ñanta ke la kodiforoo le ti, ì looraŋolu ye ke jaawaloo ti. 18 Sansaŋo karoo ñanta ke la nonkonkatiñaa keme le ti, a fanoo nonkonkatiñaa taŋ luulu, a loo nonkonkatiñaa luulu. Ridoolu ñanta ke la perekaanoo le ti, a looraŋolu ye ke jaawaloo ti. 19 Tiriliisoo jooraŋ doolu aniŋ pikaloolu mennu keta sansaŋo niŋ tiriliisoo bala, bee ñanta ke la jaawaloo le ti.
Tuloo lampu looraŋo ye
(3 Musa 24:1-4)20 Banisirayilankoolu yaamari fo ì si olifu* tulu kendoo samba i ye naŋ, fo lampoolu si tu malariŋ. 21 Haaruna niŋ a dinkewolu le ñanta lampoolu mala la, mennu be Bendulaa Tiriliisoo kono ridoo ye banta la, meŋ be Kambeŋ Kunewo* ñaato. Ì ñanta ì mala la n ñaatiliŋo le la, ka bo wulaaroo fo soomandaa. Banisirayilankoolu niŋ ì koomalankoolu ñanta ñiŋ yaamaroo muta la le fo abadaa.
© Mandinka Bible © Bible Society in The Gambia, 2011
