Musa la wuluwo
1 Saayiŋ, kewo doo meŋ bota Lewi lasiloo kono, ye musoo futuu, a niŋ meŋ bota lasili kiliŋ. 2 A naata konoo taa, a ye dinkewo wuluu. Kabiriŋ a ye a je ko, dindiŋ kekuuriŋo le mu, a ye a maabo fo kari saba. 3 Kabiriŋ a maŋ a maabo noo kotenke, a ye sinsiŋo taa, meŋ dadaata niŋ baakinti kaloolu la, a ye a muu niŋ manoo la. A ye dindiŋo landi a kono, a ye a ke farasaañaŋolu kono, mennu be Nayili Boloŋo kono. 4 A kotoomusoo loota dulaa jaŋo to, ka a juubee, meŋ be ke la a la.
5 Bituŋ Firawoona dimmusoo taata Nayili Boloŋo to kuwo la, a la dookuulaa sunkutoolu be taamaŋ-taamaŋ na baa daala. A ye sinsiŋo je farasaañaŋolu kono, bituŋ a ye a la jommusu doo kii, ka taa a kamma. 6 A ye a yele, a ye deenaanoo je. A be kumboo la, aduŋ a naata balafaa soto a ye. A ko, “Ñiŋ mu Hiburunkoolu* le la deenaanoo ti.” 7 Wo to le deenaanoo kotoo keebaa ye Firawoona dimmusoo ñininkaa ko, “Fo ŋa taa Hiburu musu kiliŋ kamma naŋ, ka deenaanoo suusundi i ye baŋ?” 8 A ye a jaabi ko, “Haa, taa.” Bituŋ sunkutoo taata deenaanoo baamaa kamma naŋ. 9 Firawoona dimmusoo ko a ye ko, “Ñiŋ deenaanoo taa ka a suusundi n ye, aduŋ m be i joo la le.” Bituŋ musoo ye deenaanoo ñiŋ taa, ka a topatoo. 10 Kabiriŋ dindiŋo menta, a ye a samba Firawoona dimmusoo yaa, aduŋ a keta wo dinkewo ti. A ye a toolaa Musa le la, ka a fo ko, “Ŋa a bondi naŋ jiyo le kono.”
Musa kanata, a borita Midiyani
11 Luŋ kiliŋ kabiriŋ Musa menta, a taata a fansuŋ moolu Hiburunkoolu yaa, a ye ì juubee, ì ka dookuu koleŋo meŋ ke. A ye Misirankoo je, a ka Hiburunkoo buutee. 12 Kabiriŋ a ye a ñaa fayi ñiŋ maafaŋo la, a maŋ moo je, a ye Misirankoo faa, a ye a saareŋ bankoo kono. 13 A saamoo a taata, a ye a je, Hiburunka fula be keloo la. Meŋ boyita, a ko wo ye ko, “Muŋ ne ye a tinna, i ka i mooñoo Hiburunkoo lipa?” 14 Keendiŋo ko, “Jumaa le ye i ke maralilaa ti, ka kiitiyo teyi ǹ teema? Fo i lafita m faa la le ko i ye meŋ ke Misirankoo la baŋ?” Bituŋ Musa silata. A ye a miira ko, a ye meŋ ke, a lonta le.
15 Kabiriŋ Firawoona ye ñiŋ moyi, a ye a kata ka Musa faa. Bari Musa borita Firawoona la le. A taata Midiyani bankoo le kaŋ, a siita koloŋo daala.
16 Saayiŋ, Midiyani piriisoo* ye dimmusu woorowula le soto. Ì naata jiibiyo la, ka beeyaŋ mindulaa fandi ì faamaa la beeyaŋolu ye. 17 Kantarilaa doolu naata ka ì bayi. Bari Musa wulita, a ye ì maakoyi, a ye ì la beeyaŋolu mindi.
18 Kabiriŋ sunkutoolu muruta ì faamaa Yetiro yaa, a ye ì ñininkaa ko, “Muŋ ne ye a tinna, bii ali seyita naŋ juuna?” 19 Ì ye a jaabi ko, “Misirankoo le ye m̀ maakoyi kantarilaalu la kuwo to. Hani a ye jiyo faŋo bii ǹ ye le, a ye ǹ na beeyaŋolu mindi.” 20 A ye ì ñininkaa ko, “A lee? Muŋ ne ye a tinna, ali ye a tu jee? Ali a kumandi, a ye naa domoroo ke.”
21 Musa naata soŋ ka sabati ñiŋ keendiŋo fee. Wo ye a dimmusoo Sipora dii a la, a ye a futuu. 22 Sipora ye dinkewo wuluu, aduŋ Musa ye a toolaa Kerisomu le la, ka a fo ko, “N keta tumarankewo le ti wandi bankoo kaŋ.”
23 Waati jaŋ koolaa, Misira mansa faata. Banisirayilankoolu woosiita ì la joŋyaa la, aduŋ ì kumboota. Ì ye maakoyiroo daani ì la joŋyaa kuwo kamma la Alla bulu. 24 Alla ye ì la woosiyo moyi le, aduŋ a hakiloo bulata a niŋ Iburayima, Isiyaaka aniŋ Yaakuba la kambeŋo la. 25 Alla ye Banisirayilankoolu la kuwo juubee, aduŋ a ye a dewuŋ.
© Mandinka Bible © Bible Society in The Gambia, 2011
