Alla batoo niŋ laahidoo la kuwo
1 I taañaa loŋ, niŋ i be Alla Batudulaa Buŋo* waliŋ na. Kata i ye i lamoyi, wo le beteyaata ñiŋ ti ka beeyaŋ sadaa* bo ko toolewolu mennu buka a loŋ ko ì ye kuu kuruŋo le ke.
2 I daa mara,
i kana soŋ i sondomoo ye feŋ-wo-feŋ maa,
i ye tariyaa ka a fo Alla ñaatiliŋo la.
Kaatu Alla be Arijana le,
ite be duniyaa.
Wo kamma la i daakumoo kana siyaa.
3 Siiboo ka naa le niŋ haajoolu siyaata.
Niŋ diyaamoo siyaata,
kuma kenseŋolu le mu.
4 Niŋ i ye laahidoo taa Alla ye, kana tonkutonku a timmandoo la. Alla buka kontaani toolewo la kuu la. I laahidita meŋ na, a timmandi. 5 Niŋ i maŋ laahidoo taa muumee, wo le fisiyaata ka laahidoo taa, i maŋ naa a timmandi. 6 Kana soŋ i daa ye i duŋ junuboo to, aduŋ kana i daa laa i faŋ kaŋ ka a fo piriisoo* ye ko, “N na laahidoo taa keta m bulu lañinoo le ti.” Kana soŋ Alla ye kamfaa i kamma, i la laahidi timmandibaliyaa kamma la. A si i la dookuu feŋolu kasaara noo le. 7 Siiboo jamaa niŋ kuma jamaa maŋ nafaa soto. Wo to, sila Alla la.
Fankoo la nafantaŋyaa
8 Niŋ i ye a je tundoo kaŋ, ì be fentaŋolu toorandi kaŋ, tiliŋo niŋ tooñaa taata, kana jaakali a kuwo la. Kaatu kantiyolu le ka ñoo kuburu. Aduŋ ì la ñaatonka baalu le ka ì tanka. 9 Bari bankoo munafaŋo, wo be moo bee le ye. Mansakewo nafaa mu ñiŋ ne ti ka senekunkoolu tankandi.
10 Kodilandii baa,
kodoo nene te a sii la muk,
aduŋ feŋ landii baa,
a nene buka sotoo ke fo a ye sii.
Ñiŋ fanaa maŋ ke feŋ ti.
11 Niŋ sotoo lafaata,
domorilaalu fanaa ka siyaa le.
A nafaa lee ì maariiñolu ye,
fo ka a juubee doroŋ?
12 Sembe dookuulaa la siinoo,
siinoo diimaa,
a ye domoroo soto a ñaama wo,
a maŋ a soto a ñaama wo,
a ka siinoo le.
Bari fankamaa la soto baa,
wo le faŋo ka a tinna
a buka siinoo noo a ñaama.
13 Kuu dimindiŋo fele, ŋa meŋ je ñiŋ duniyaa tiloo koto:
Fankamaa ye a la sotofeŋo bee laŋ-laŋ ñoo kaŋ,
a naata ke a ye mantaabembaliyaa ti.
14 A foota a la fankoo la,
mantaabembaliyaa kono.
Niŋ a ye diŋo soto,
a be a bulu kenseŋo le tu la.
15 Hadamadiŋo naata ñaameŋ
ka bo a baamaa wuluuñaŋo kono,
a be muru la wo le ñaama.
Ko a kenseŋo naata ñaameŋ,
a la dookuwo munafaŋo,
a niŋ hani feŋ ne te muru la ka tara a bulu.
16 Ñiŋ fanaa mu kuu dimindiŋo le ti:
Ko hadamadiŋo naata ñaameŋ,
a be muru la wo le ñaama.
Wo to, a la munafaŋ sotoo nafaa lee,
baawo a ye dookuwo ke foñoo le ye?
17 Ñiŋ koolaa,
a ka a la baluwo muumeelaa bee ke diboo le kono,
wo niŋ niitoora bambaloo, kuuraŋo, aniŋ niikuyaa.
18 Nte naata meŋ je kuu kendoo ti, wo le mu ka domoroo ke, ka i miŋ. A beteyaata ka seewoo kuu kendoolu la i la kata kuwolu bee to, ñiŋ duniyaa tiloo koto, i baluu tili dantaŋolu kono, Alla ye mennu dii i la. Wo le mu i niyo ti. 19 Niŋ Alla ye fankoo dii hadamadiŋo la, a ye a sotondi feŋolu la, wo mu soori baa le ti. Niŋ Alla ye a maakoyi ka seewoo soto ì to, ka tinewo aniŋ niiseewoo soto a la dookuwolu to, wo fanaa bota Alla le bulu. 20 Alla ka niiseewoo meŋ dii hadamadiŋo la, wo ka a tinna le, a hakiloo buka tara looriŋ a baluu tiloo la sutiyaa kaŋ.
© Mandinka Bible © Bible Society in The Gambia, 2011
