Feŋo bee ye waatoo le soto
1 Feŋ-wo-feŋ, waatoo le be a la,
waati le be looriŋ feŋolu bee la ñiŋ duniyaa kono:
2 Waati le be wuluwo la,
waati be faa la.
Waati le be tuturoo la,
waati be wuturoo la.
3 Waati le be faaroo la,
waati be kendeyandiroo la.
Waati le be tiñaaroo la,
waati be dadaaroo la.
4 Waati le be kumboo la,
waati be jeloo la.
Waati le be niikuyaa la,
waati be doŋo la.
5 Waati le be berefayoo la,
waati be ì kafuñoomoo la.
Waati le be, ka i miniŋ ñoo la,
waati be ñoo minimbaliyaa la.
6 Waati le be ñinindiroo la,
waati be foo la.
Waati le be feŋo maaboo la,
waati be a fayoo la.
7 Waati le be feŋo la faroo la,
waati be a karoo la.
Waati le be deyoo la,
waati be diyaamoo la.
8 Waati le be kanunteeyaa la,
waati be konnanteeyaa la.
Waati le be keloo la,
waati be kayiroo la.
9 Dookuulaa ka muŋ tinee le soto, a la dookuwo bataa to? 10 Ŋa a je le, Alla ye dunoo meŋ laa hadamadiŋo kaŋ, a ka tara a faŋ batandi la a la. 11 Alla ye kuwo bee ke a tumoo le la, aduŋ a ñiiñaata. A ye hadamadiŋo hakilimaayandi badaa-badaa baluwo la kuwo la le, bari hani wo, Alla la keroo, hadamadiŋo buka a fahaamu noo, a foloodulaa te, sako a labandulaa. 12 Ŋa a loŋ ne ko, hadamadiŋo la baluwo kono, feŋ ne maŋ beteyaa a fee, ka tambi niidiyaa kuwo la, aniŋ faŋ seewondoo. 13 Alla la sooroo le mu hadamadiŋolu bee ye, ka domoroo niŋ miŋo ke, aniŋ ka niiseewoo soto i la dookuwolu to. 14 Ŋa a loŋ ne ko, Alla ye kuu-wo-kuu ke, wo le be tu la fo fawu. Feŋ te lafaa noo la a kaŋ, sako feŋ si talaa a bala. Alla ye ñiŋ ke le, i si a je moolu si a kuliyaa.
15 Feŋ-wo-feŋ be keriŋ bii,
a nene tarata keriŋ ne nuŋ.
Aduŋ feŋ-wo-feŋ be naa ke la,
a nene ka ke le.
Meŋ tambita,
Alla le ka lañini a la kewo la kotenke.
Tilimbaliyaa kuwolu duniyaa kono
16 Ŋa kuwo doo le fanaa je ñiŋ duniyaa tiloo koto:
Kiitiidulaalu to,
tilimbaliyaa le ka tara jee,
aduŋ tooñaa kumfaa dulaalu to,
tilimbaliyaa le ka tara jee.
17 N ko m faŋ ye ko,
“Moo tilindiŋ, moo kuruŋ,
Alla be ì bee le kiitindi la.
Ate le ye waatoo londi feŋo bee la,
a ye waatoo londi baara kuwolu bee la.”
18 N ko m faŋ ye hadamadiŋolu la karoo la ko, “Alla le be ì kotobo kaŋ ka a yitandi ì la ko, ì be le ko beeyaŋo. 19 Hadamadiŋo labaŋo niŋ beeyaŋo labaŋo bee kiliŋ. Labaŋñaa kiliŋo le ka tara ì bee batu kaŋ. Ñiŋ doo ka faa ñaameŋ, ñiŋ doo fanaa ka faa wo le ñaama. Nii kiliŋo le be ì bee la. Hadamadiŋ maŋ fisa beeyaŋ ti. Ñiŋ bee maŋ ke feŋ ti. 20 Ì bee labandulaa kiliŋ. Ì bota bankumunkoo le bala, aduŋ ì bee be muru la ka ke wo bankumunku kiliŋo le ti kotenke. 21 Jumaa le ye a loŋ fo hadamadiŋo niyo ka sele le ka taa santo, waraŋ fo beeyaŋolu taa ka taa bankoo le duuma?”
22 Ŋa a je le ko, kuu bete te hadamadiŋo fee, meŋ fisiyaata faŋ seewondoo ti a la dookuwolu to. Wo le mu a taa ti. Jumaa le si a jerendi noo kuu la, meŋ be naa ke la, ate faariŋ koolaa?
© Mandinka Bible © Bible Society in The Gambia, 2011
