Banisirayila ye Mansa Oki noo keloo to
(4 Musa 21:33-35)1 Musa ko ì ye ko:
Wo le to ǹ tententa ŋà Basani tundoo siloo taa. Bituŋ Basani mansa Oki niŋ a la kelediŋolu fintita naŋ ka naa ǹ kele, Edireyi saatewo daala. 2 Bari Yaawe* ko n ye le ko, “Musa, kana sila a la. M be a niŋ a la kelediŋolu niŋ a la bankoo bee duŋ na ali bulu le. I ye meŋ ke Amorinkoolu la mansa Sihoni la meŋ marata nuŋ Hesiboni la, i si wo ñoŋo ke Mansa Oki fanaa la ka a kasaara.”
3 Bituŋ Yaawe ye Mansa Oki niŋ a la moolu bee duŋ m̀ bulu, ŋà ì bee faa, hani kiliŋ maŋ tu a niyo la. 4 Ŋà a la saatewolu bee muta, hani kiliŋ maŋ tu jee, m̀ maŋ meŋ taa. Ŋà Arikobu tundoo saatewolu bee le taa mennu taata kaañaŋ saatee taŋ wooro fee, Oki marata mennu la Basani mansamarali bankoo kaŋ. 5 Ñiŋ saatewolu bee tatata sansaŋ jaŋ baalu le la, ì bee niŋ ì bundaalu niŋ ì sorondaŋ neebaaroolu. Saateeriŋ jamaalu fanaa tarata nuŋ ì daala le mennu maŋ tata. 6 Ǹ naata wo saatewolu niŋ ì moolu bee turutumbuŋ, musu kafuriŋ kee, dindiŋ, keebaa, ko ŋà meŋ ñoŋo ke saatewolu la, Hesiboni mansa Sihoni la marali bankoo. 7 Ŋa beeyaŋolu bee niŋ feŋ kummaa koteŋolu taa saatewolu ñiŋ to.
8 Ŋà Yoridani Boloŋo tiliboo la bankoo taa Amorinkoolu la mansakee fuloo bulu teŋ ne, ka bo Arinoni Wulumbaŋo to ka taa fo Herimoni* Konkoo to. 9 Sidoninkoolu ka a fo Herimoni ye le Siriyoni, Amorinkoolu ka a fo a ye Seniri. 10 Ŋà Basani mansa Oki la saatewolu bee le taa mennu be konkoo kaŋ Kileyadi tundoo kaŋ ka taa fo tilibo karoo saatee fuloo to mennu mu Saleka niŋ Edireyi ti.
11 Mansa Oki le keta moo labaŋo ti ka faa Rafa koomalankoolu kono. Ì ye a landi daameŋ, a la jamfoo kaañanta nonkonkatiñaa kononto le fee, a fanoo kaañanta nonkonkatiñaa naani fee. Hani bii, a la kaburoo be Ammoninkoolu la saatee baa to le, Raba.
Banku talaa, Yoridani Boloŋo tilibo karoo la
(4 Musa 32:1-42)12 Kabiriŋ ŋà ñiŋ bankoo taa waati meŋ na, ŋa doo talaa Rubeni lasiloo niŋ Kadu lasiloo moolu le teema, ka bo Aroweri saatewo to meŋ be Arinoni Wulumbaŋo dandaŋo la ka taa konkotundoo* talantewo meŋ be Kileyadi tundoo kaŋ aniŋ a saatewolu. 13 Bituŋ n naata Kileyadi tundoo talantee doo aniŋ Basani tundoo bee dii Manase lasili moolu talantewo la. Basani le mu bankoo ti, Oki marata nuŋ daameŋ na, Arikobu tundoo be jee le to, ì ka a fo daameŋ ye nuŋ Rafa koomalankoolu la bankoo. 14 Bituŋ Yayiri meŋ bota Manase lasiloo kono, wo naata Arikobu tundoo bee taa, meŋ be Basani bankoo kaŋ, ka taa fo naanewo to, Kesurinkoolu niŋ Maakatinkoolu be daameŋ. A ye jee saateeriŋolu toolaa a faŋo le la, aduŋ ì ka a fo wo saatewolu ye le Yayiri la saateeriŋolu fo ka naa bula bii la.
15 Ŋa Kileyadi talantee doo dii Makiri koomalankoolu le la. 16 Bituŋ ka bo Kileyadi tundoo kara doo la ka taa fo Arinoni Wulumbaŋo to, ŋa wo dii Rubeni lasiloo niŋ Kadu lasiloo moolu le la. Arinoni Wulumbaŋo teema le keta naanewo ti bulubaa karoo la. Yaboki Boloŋo le keta ì niŋ Ammoninkoolu teema naanewo ti, maraa karoo la. 17 Tilijii karoo naanewo bota niŋ Yoridani Boloŋo le la ka taa niŋ Koojii Baa bulubaa kara maafaŋo la, ka kuntu niŋ Kinnereti Baa maraa karoo la, ka taa fo Pisika Konko jindaa la, tilibo karoo la.
18 Bituŋ n naata ñiŋ yaamaroolu dii wo lasili saboo la ko, “A fele, Yaawe ali la Alla faŋo le ye ñiŋ bankoo dii ali la meŋ be Yoridani tilibo karoo la. Wo to ali ali la kelediŋolu parendi keloo la, ali ye ì kii ka Yoridani Boloŋo teyi ka tambi ali baadiŋ Banisirayila kelediŋ koteŋolu ñaato, ka ì maakoyi. 19 Bari ali si ali la musoolu niŋ dindiŋolu ka taa ali la beeyaŋolu tu saatewolu to ŋa mennu dii ali la. Ŋa a loŋ ne ko, ali ye beeyaŋ jamaa le soto. 20 Ali ñanta ali baadiŋ Banisirayila lasili doolu maakoyi la le fo ì si ì jawoolu noo, ì ye bankoo taa Yaawe ali la Alla be naa meŋ dii la ì la, Yoridani Boloŋo tilijii karoo la. Niŋ Yaawe ye a ke fo ì sabatita kayiroo kono ko a ye a ke ali ye ñaameŋ, bituŋ ali si muru naŋ ñiŋ dinkiraa to ŋa meŋ dii ali la.”
21 Wo to le n naata Yosuwa yaamari ko, “Ite faŋo ñaa seedeyaata kuwolu bee la le Yaawe ǹ na Alla ye mennu ke ñiŋ mansakee fuloo la, Sihoni niŋ Oki. A be wo kuu kiliŋo le ke la mansamarali banku koteŋolu la, ali be taa daamennu to. 22 Ali kana sila ì la, kaatu Yaawe ali la Alla le be keloo ke la ali ye.”
Yaawe maŋ soŋ, Musa ye duŋ Kanaani bankoo kaŋ
23 Wo waatoo la, ŋa Yaawe daani n sondomoo bee le la ko, 24 “Hee Yaawe n na Alla, ŋa a loŋ ne ko, i ye i la semboo niŋ waroo domandiŋ doroŋ ne dati ka a yitandi n na, i la dookuulaa. Alla koteŋ te saŋo niŋ bankoo teema meŋ si kaawakuwolu ke ko ite ye a ke ñaameŋ! 25 Yaawe, yamfa n ye, fo n si wo banku betoo je, meŋ be Yoridani Boloŋo kara doo la, ñiŋ konkotundi ñiimaa aniŋ Libanooni konkoolu.”
26 Ali la kuwo ye a tinna le, Yaawe kamfaata n kamma, a maŋ soŋ ka i lamoyi n na. Bituŋ a ko n ye ko, “A kaañanta le. Kana ñiŋ kuwo fo n ye kotenke! 27 I si sele Pisika Konkoo santo, i ye i kuŋo wulindi, i ye tiliboo niŋ tilijiyo la juubee, ka taa bulubaa niŋ maraa la. I si feŋolu koroosi kendeke, kaatu i te Yoridani Boloŋo teyi la. 28 Yosuwa yaamari, i ye a bambandi, i ye a fatiyandi. Kaatu ate le be Banisirayila ñaatonkayaa la ka Yoridani Boloŋo teyi. Ate le be a tinna la ì ye bankoo taa, i ka meŋ je teŋ.”
29 Wo to le ǹ naata tara wulumbaŋo kono meŋ be Beti-Pewori saatewo ñaatiliŋo la.
© Mandinka Bible © Bible Society in The Gambia, 2011
