Filindirilaalu la yankankatoo
1 Musa tententa ka a fo ko:
Annabiyomoo waraŋ siiboo fasarilaa si wuli noo ali kono le ka a kankulaa ko, kaawakuwo be ke la le, waraŋ taamanseeroo. 2 Ì ye meŋ kankulaa, wo si ke noo le. Bari niŋ ì ko ali ye ko, “Ali ŋà bula alla koteŋolu nooma ka ì batu,” ali nene maŋ mennu loŋ, 3 ali kana ali tuloo loo ì la. Yaawe* ali la Alla be ali kotobo kaŋ ne ka a loŋ fo ali ye a kanu ali sondomoo bee le la, aniŋ ali niyo bee la. 4 Ali ñanta bula la Yaawe le nooma, ali la Alla, ali si sila a la, ali ye a la yaamaroolu muta, ali ye soŋ a la kumakaŋolu ma. Ali si a batu, ali ye i deŋ a la. 5 Wo annabiyomoo waraŋ siiboo fasarilaa ñanta le ka faa, bayiri a ka ali kawandi le ka balaŋ siloo la, Yaawe ali la Alla ye ali yaamari ka taama meŋ na. Ate le ye ali bondi naŋ joŋyaa kono Misira bankoo kaŋ. Ali ñanta moo kuruŋolu bondi la ali kono le.
6 Wo ñaa kiliŋo ñaama, hani i niŋ meŋ mu baa kiliŋ ti, waraŋ i niŋ meŋ mu faa kiliŋ ti, i diŋo waraŋ i kanumusoo waraŋ i teeri sutuŋo si naa noo i kaŋ ne kulloo kono ka i neenee ko, “Ali ŋà alla koteŋolu batu,” ite niŋ i mumuñolu nene maŋ mennu loŋ. 7 Ñinnu si ke noo moolu la alloolu ti, mennu be ali daala, waraŋ moo koteŋolu mennu be dulaa jaŋo to ñiŋ duniyaa tonkoŋ naanoo to. 8 Kana i lamoyi ñiŋ moo siifaa la. Kana balafaa waraŋ hiina a la, aduŋ i kana a sutura. 9 Ali ñanta wo maarii faa la le. I foloo si ke moo ti ka a buŋ beroo la. Wo koolaa moo doolu fanaa si naa beroo taa ka a buŋ. 10 Ali si a kurulabuŋ fo a ye faa. Kaatu a be a kata kaŋ ne ka ali koo dindi Yaawe la, ali la Alla, meŋ ye ali bondi naŋ joŋyaa kono Misira bankoo kaŋ. 11 Niŋ Banisirayilanka toomaalu ye a moyi meŋ keta wo maarii la, wo be ì silandi la le, aduŋ moo nene te wo kuu kuruŋ siifaa ke la kotenke.
12 Niŋ ali sabatita saatewolu kono, Yaawe be mennu dii la ali la, ali si a moyi noo saatee kiliŋ kono le ko, 13 moo kuruŋolu le wulita ka saatee moolu filindi ka a fo ì ye ko, “Ali ŋà taa alla koteŋolu batu,” ali nene maŋ mennu loŋ. 14 Niŋ ali ye wo kibaari siifaa moyi, ali si wo kuwo kisikisi kendeke. Aduŋ niŋ a lonta ko ñiŋ kuu haraamuriŋo keta ali kono le, 15 ali ñanta wo saatee moolu niŋ ì la beeyaŋolu faa la hawusaroo* le la, ali ye a feŋolu bee kasaara, ali ye saatewo ñiŋ turutumbuŋ. 16 Ali si jee saatee moolu la sotofeŋolu bee kafu ñoo ma, ali ye ì jurumi bantabaa to. Ali si ñiŋ feŋolu niŋ saatewo bee jani ka a ke jani sadaa* ti Yaawe ye, ali la Alla. Ali jee ke tumbuŋo ti fo fawu, a maŋ ñaŋ na lookuu la. 17 Ali kana feŋ kiliŋ taa meŋ ñanta kasaara la, ka a maabo ali faŋolu ye. Niŋ ali ye ì kasaara, Yaawe jusoo si sumayaa noo le, a ye balafaa yitandi ali la, aniŋ hiinoo, a ye ali yaatewo siyandi, ko a kalita ali mumuñolu ye ñaameŋ. 18 Yaawe be ñiŋ bee ke la ali ye le, niŋ ali sonta a la kumakaŋo ma, ali ye a la yaamaroolu muta, ŋa mennu dii ali la bii, ali ye kuu ke meŋ tilinta Yaawe ñaa koto, ali la Alla.
© Mandinka Bible © Bible Society in The Gambia, 2011
