Alla Batudulaa Buŋo loo parendiroo
(1 Mansoolu 5:1-18)1 Bituŋ Sulemani lafita ka Batudulaa Buŋo* loo Yaawe tooyaa la, aniŋ ka mansasuwo loo a faŋo ye. 2 A ye moo wuli taŋ woorowula le bula feŋ yorondoo la, a ye moo wuli keme seyi bula bere siŋo la konkotundoo* kaŋ, a ye moo wuli saba moo keme wooro marandi ì la.
3 Sulemani ye kumoo kii Tire mansa Hiramu kaŋ ko:
“Koomanto i nene ka sedari* babaroolu kii naŋ m faamaa Dawuda ye le, ka mansasuwo loo, a be sabati la daameŋ. 4 Saayiŋ a fele, m pareeta ka batudulaa loo Yaawe n na Alla tooyaa la, aniŋ ka a kerekere a ye. Ñiŋ be ke la dulaa le ti, ka cuuraayi diimaa siisindi a ye jee, ka mbuuru senuŋo* bo a ye waati-wo-waati, aniŋ jani sadaalu* soomandaa-wo-soomandaa niŋ wulaara-wo-wulaara, Loobula Luŋ-wo-Loobula Luŋ, Kari Kuta-wo-Kari Kuta Juuraloo*, aniŋ juurali looriŋolu la ka Yaawe n na Alla batu. A ye Banisirayila yaamari le ka ñinnu ke fo abadaa.
5 “M be naa buŋo meŋ loo la, a be wara la le, kaatu ǹ na Alla le warata ka tambi alla koteŋolu bee la. 6 Wo to saayiŋ, jumaa le si buŋo loo noo a ye, a si kuŋ daameŋ? Hani saŋ fatoolu daŋo to, a te kuŋ na wo to. Wo to nte mu jumaa le ti ka buŋo loo noo a ye, fo dulaa doroŋ, jani sadaa be kali bo la a ye daameŋ?
7 “Wo kamma la moo kii naŋ n ye, meŋ ye sanoo, kodiforoo, jaawaloo, aniŋ nee tunkaŋo noo kendeke, a ye daaroo noo kendeke, ka daarifaani wuleŋo, buluuriŋo aniŋ wuluyeloo daa, aduŋ a ye ñenjeroo fanaa noo, fo a niŋ m faamaa ye bulukalaŋ dookuulaalu mennu tomboŋ Yerusalaamu niŋ Yahuuda muumewo, si dookuwo ke noo.
8 “Sedari yiroolu fanaa kii n ye naŋ, junipa yiroolu aniŋ alikumu yiroolu ka bo naŋ Libanooni, ka ke babaroo ti. Kaatu ŋa a loŋ ne ko, i la dookuulaalu maŋ ñoŋ soto yiriteyoo la. M be n na dookuulaalu kii la naŋ ne ka ì maakoyi, 9 ka babara jamaa parendi. M be naa buŋo meŋ loo la, a be wara la le a ye ñiiñaa. 10 M be ñiŋ ne dii la i la dookuulaalu la mennu be yiroo teyi la, wiiti* siimaŋo tooni wuli fula, baali* siimaŋo tooni wuli fula, wayini* barika wuli fula, aniŋ olifu* tuloo barika wuli fula.”
11 Bituŋ Tire mansa Hiramu ye jaabiroo safee leetaroo to Sulemani ye ko:
“Yaawe ye a la moolu kanu le, wo le ye a tinna a ye i ke ì la mansa ti.”
12 Hiramu tententa ka a fo ko:
“Tentoo be Yaawe ye, Banisirayila la Alla, meŋ ye saŋo niŋ bankoo daa, meŋ ye dinkee ñaamendiŋo dii Mansa Dawuda la, meŋ ye kuwolu keñaalu loŋ, a ye fahaamuroo soto, meŋ be batudulaa loo la Yaawe ye, aniŋ ka mansasuwo loo a faŋo ye.
13 “Saayiŋ, a fele, m be Huramu-Abi kii kaŋ naŋ, meŋ ye bulukalaŋ dookuwo kalamuta baake. 14 A baamaa bota Dani lasiloo le kono, a faamaa bota Tire. A buloo koyita sani dookuwo to le, kodiforoo, jaawaloo, newo, beroo aniŋ babaroo, aduŋ daaroo fanaa biriŋ daarifaani wuleŋo, buluuriŋo, wuluyeloo aniŋ koyimaa. A ye ñenjeroo noo, feŋ-wo-feŋ diita a la, a si a muluŋo dadaa noo le. A niŋ i la bulukalaŋ dookuulaalu niŋ m maarii i faamaa Dawuda la bulukalaŋ dookuulaalu si dookuwo ke.
15 “Saayiŋ, m maarii, i ye wiiti niŋ baali siimaŋ kesoo meŋ na kuwo fo, aniŋ wayinoo niŋ olifu tuloo, ì kii naŋ. 16 M̀ be yiroolu teyi la Libanooni le, ko i suulata a la ñaameŋ, aduŋ m̀ be ì sitiŋ-sitiŋ na ñoo bala le ka ì yankandi baa la fo Yopa, bituŋ i si ì taa jee ka ì samba Yerusalaamu.”
17 Sulemani naata tumarankewolu bee yaatee mennu be sabatiriŋ Banisirayila bankoo kaŋ, a faamaa Dawuda la ì yaatewo koolaa, ì yirikoo taata kaañaŋ moo wuli keme wuli taŋ luulu niŋ saba, aniŋ moo keme wooro le fee. 18 A ye moo wuli taŋ woorowula bula feŋ yorondoo la, a ye moo wuli taŋ seyi bula bere siŋo la konkoolu kaŋ. A ye moo wuli saba keme wooro marandi dookuulaalu ma ka dookuwo taañaa koroosi, aniŋ ka a je ko, ì ye dookuwo ke.
© Mandinka Bible © Bible Society in The Gambia, 2011
