Sawulu niŋ a dinkewolu la saayaa
(1 Taarika 10:1-12)1 Saayiŋ Filisitinkoolu ye keloo boyi Banisirayilankoolu kaŋ ne, aduŋ ì borita Filisitinkoolu ñaato. Moo jamaa le faata Kilibowa Konkoo kaŋ. 2 Filisitinkoolu ye keloo kandindi Sawulu niŋ a dinkewolu kaŋ, bituŋ ì ye a dinkewolu Yonatani, Abinadabu aniŋ Malikisuwa faa le. 3 Keloo kandita Sawulu la karoo la le, kabiriŋ moolu mennu ka keloo ke kalabeñoo la ye a tarandi, ì ye a barama saŋarake le. 4 Sawulu ko a la kelejooraŋ sambalaa ye ko, “I la hawusaroo* saba naŋ, i ye m faa. Niŋ wo nte, ñiŋ moo sunnabaloolu be n soo la le, aduŋ ì be tuluŋ na m furewo la le.” Bari kelejooraŋ sambalaa maŋ haañi ka wo ke. Wo to le Sawulu ye a fansuŋ hawusaroo londi, a ye a faŋ fayi a kaŋ. 5 Kabiriŋ kelejooraŋ sambalaa ye a je ko, Sawulu faata le, a fanaa ye i fayi a faŋo la hawusaroo kaŋ, ì bee faata. 6 Bituŋ Sawulu niŋ a dinkee saboo, a la kelejooraŋ sambalaa aniŋ a la kewolu bee faata luŋ kiliŋ ne. 7 Kabiriŋ Banisirayilankoolu mennu be wulumbaŋo kara doo la aniŋ mennu be Yoridani Boloŋo kankuŋ doo la ye a je ko, Banisirayilankoolu la kelediŋ kafoolu borita le, aduŋ Sawulu niŋ a dinkewolu faata le, ì wudaayita ì la saatewolu to, ì borita.
8 A saamoo, kabiriŋ Filisitinkoolu naata ka furewolu la feŋolu bondi, ì ye a tara Sawulu niŋ a dinkee saboo furewolu be laariŋ Kilibowa Konkoo kaŋ.
9 Ì ye Sawulu kuŋo kuntu, ì ye a la kelejooraŋolu bondi. Bituŋ ì ye kiilaalu kii Filisitinkoolu la bankoolu bee kaŋ, ka ñiŋ kibaaroo kankulaa ì la jalambuŋolu to aniŋ ì la moolu ye. 10 Wo to le ì ye a la kelejooraŋolu ke ì la jalammusoo Asitoreti* la buŋo kono, aduŋ ì ye a baloo pempeŋ Beti-Sani saatewo tata sansaŋo le bala. 11 Kabiriŋ moolu mennu be Yabesi-Kileyadi saatewo to ye a moyi, Filisitinkoolu ye meŋ ke Sawulu la, 12 ì la kee fatiŋolu bee ye suutoo taama le fo Beti-Sani. Ì ye Sawulu niŋ a dinkewolu furewolu bondi Beti-Sani saatee sansaŋo bala, ì ye ì samba Yabesi, ì ye ì jani jee le to. 13 Wo to le ì ye ì kuloolu taa, ì ye ì baadee yiroo doo koto, meŋ be Yabesi. Bituŋ ì sunta fo tili woorowula.
© Mandinka Bible © Bible Society in The Gambia, 2011
