Dawuda borita ka taa Nobu
1 Dawuda taata Piriisi* Ahimeleki yaa Nobu. Ahimeleki jarajaratoo le fintita ka taa a benduŋ, aduŋ a ye a ñininkaa ko, “Muŋ ne ye a tinna, i naata i faŋo ye jaŋ? I niŋ moo maŋ naa ñoo la.”
2 Dawuda ye Piriisi Ahimeleki jaabi ko, “Mansa le ye n kii haaji doo la, aduŋ a ko n ye le ko, moo maŋ ñaŋ na a loŋ na, a ye n kii meŋ na, aniŋ a ye m bula meŋ na. Ŋa a fo n na kewolu ye le, ì ñanta n tara la daameŋ. 3 Saayiŋ duŋ, muŋ ne be i bulu? Mbuuru kuŋ luulu dii n na, waraŋ feŋ-wo-feŋ be i bulu.”
4 Piriisoo ye Dawuda jaabi ko, “Mbuuru kenseŋ-kenseŋo te m bulu jaŋ. Mbuuru senuŋo* le be jaŋ. I si a taa, niŋ a ye a tara, i la kewolu niŋ musoolu maŋ kafu.”
5 Dawuda ko a ye ko, “Niŋ n ka finti waati-wo-waati, ǹ niŋ musu buka kafu. N na kewolu ka ì faŋolu seneyandi le, hani a ye a tara m be taa haajindiŋolu le la, sako niŋ a ye a tara, m be taa ñiŋ haaji senuŋ baa la.” 6 Bituŋ piriisoo ye mbuuru senuŋo dii a la, kaatu mbuuru koteŋ te jee, fo ì ye meŋ landi Alla ye, aduŋ ì ye a bondi taabulu senuŋo le kaŋ, ì ye kutamaa seyindi jee.
7 Saayiŋ Sawulu la dookuulaa doo tarata jee le wo luŋo, kaatu a ñanta diina kuu doo le timmandi la. A too mu Doyeki le ti, Edomunkoo, aduŋ a keta Sawulu la beeyaŋ kantalaa kuntiyo le ti.
8 Dawuda ye Ahimeleki ñininkaa ko, “I maŋ sooroo waraŋ hawusaroo* soto jaŋ baŋ? M maŋ n na hawusaroo samba naŋ sako n na jooraŋ koteŋolu, kaatu mansa la haajoo mu tariyaa kuwo le ti.”
9 Piriisoo ye a jaabi ko, “I ye Koliyati Filisitinkoo meŋ faa Ela wulumbaŋo kono, wo le la hawusaroo be jaŋ. A be moromororiŋ bayoo le kono efodoo* kooma. Wo koolaa hawusari koteŋ te jaŋ. Niŋ i lafita a la, i si a taa.”
Dawuda ko, “Doo te jee meŋ niŋ a mulunta, a dii n na.”
Dawuda borita Filisitinkoolu la mansa yaa
10 Bituŋ wo luŋo Dawuda borita ka bo Sawulu yaa, a taata Akisi yaa, meŋ mu Kati mansa ti.
11 Bari Akisi la dookuulaalu ko mansa ye ko, “Fo ñiŋ te Dawuda ti, bankoo la mansa. Ñiŋ ne mu kewo ti, ì ka meŋ na kuwo denkili, niŋ ì be doŋo la ko:
‘Sawulu ye moo wuloolu le faa,
bari Dawuda ye moo wuli taŋolu le faa.’ ”
12 Ñiŋ kumoolu ye Dawuda jaakali le, aduŋ a silabaata Akisi la, Kati mansa. 13 Bituŋ a ye a maañaa faliŋ a ñaa la. Niŋ ì be jee, a ka a faŋo ke ì ye le ko, moo meŋ ñaamaata. A ka maarikoolu ke mansa la koridaa daalu bala, aduŋ a ka a la yooloo bula a ye joloŋ a booraa bala.
14 Akisi ko a la dookuulaalu ye ko, “Ali ñiŋ kewo juubee, a ñaamaata le. Muŋ ne ye a tinna, ali ye a samba n ye naŋ? 15 Fo m foota ñaamaatoolu la le baŋ, fo ali ka naa ñiŋ samba naŋ, a ka naa ñaamaatoo maañaa ke n ñaatiliŋo la? Fo ñiŋ kewo be duŋ na n na buŋo kono le baŋ?”
© Mandinka Bible © Bible Society in The Gambia, 2011
