1 Ì ye Alla la Kambeŋ Kunewo* samba naŋ, ì ye a londi tiriliisoo* koto, Dawuda ye meŋ loo a ye. Bituŋ ì ye jani sadaalu* niŋ kayira sabatindiraŋ sadaalu bondi Alla ñaatiliŋo la. 2 Kabiriŋ Dawuda pareeta jani sadaalu niŋ kayira sabatindiraŋ sadaalu bondi la, a ye neemoo daani moolu ye ka bo niŋ Yaawe* too la. 3 Bituŋ a ye mbuuru kuŋo, subu janiriŋo aniŋ wayini* yiridiŋ jaaroo doo dii Banisirayila kewolu niŋ musoolu bee kiliŋ-kiliŋ naa la.
4 Wo koolaa a ye Lewi lasiloo moo doolu tomboŋ ka ke dookuulaalu ti Yaawe la Kambeŋ Kunewo ñaatiliŋo la, ka Yaawe Banisirayila la Alla batu, ka a tentu aniŋ ka a jayi. 5 Asafu le mu ñaatonkoo ti, Jakariya ye wo nooma, Yeyeli, Semiramoti, Yehiyeli, Matitiya, Eliyabu, Benaya, Obedi-Edomu aniŋ Yeyeli. Wolu le ka kontiŋolu niŋ kooraalu kosi, Asafu le ka jaawali palaatoolu kosi. 6 Bituŋ piriisoolu* Benaya niŋ Yahasiyeli le ka footaŋolu fee waati-wo-waati Alla la Kambeŋ Kunewo ñaatiliŋo la. 7 Wo luŋo le mu luŋ foloo ti, Dawuda ye Asafu niŋ a mooñoo Lewi lasiloo moolu tomboŋ ka tenturu suukuwo laa Yaawe ye.
Tenturu Suukuwo
(Jabuuroolu 105:1-15Jabuuroolu 96:1-13Jabuuroolu 106:1Jabuuroolu 47-48)8 Ali tenturoo dii Yaawe la.
Ali ye a batu a too la.
Ali a fo bantala banku* moolu ye
a ye kuwolu mennu ke.
9 Ali suukuwo laa a ye ka a jayi,
ali a fo, a ye kaawakuwolu mennu ke.
10 Ali kidimandiroo ke a too senuŋo la.
Moolu mennu ka Yaawe ñini, ì ye jusulaa.
11 Ali ñinindiri ke Yaawe la, a niŋ a la semboo,
ali a ñini ka tara a ñaatiliŋo la waati-wo-waati.
12-13 Alitolu Isirayila, Alla la dookuulaa koomalankoolu,
Yaakuba koomalankoolu, Yaawe ye mennu tomboŋ,
ali i miira kuu baalu la, a ye mennu ke,
aniŋ a ye kaawakuwolu niŋ kiitiiteyoolu mennu taamandi.
14 Ate Yaawe le mu ǹ na Alla ti,
a la kiitiiteyoo le ka taama duniyaa bee kono.
15 Ali ali hakiloo tu a la kambeŋo to fo abadaa,
a la yaamaroo, hani fo jamaani wuliwuloolu la.
16 A ye kambeŋo meŋ siti a niŋ Iburayima teema,
a kalita wo laahidoo la Isiyaaka le ye.
17 A ye a londi luwaa le ti, ka wo laahidoo bambandi Yaakuba ma,
kambeŋo meŋ laahidoo be tu la a niŋ Isirayila teema fo abadaa.
18 A ko, “M be Kanaani bankoo dii la i la le,
a ye ke i koomalankoolu la keetaafeŋo ti.”
19 Tuma meŋ ì yaatewo be dooyaariŋ,
ì moo dantaŋ doroŋ ne mu,
aduŋ tumarankewolu le mu ì ti nuŋ Kanaani bankoo kaŋ.
20 Ì tarata yaayi la le ka bo banku ka taa banku,
ka bo mansamarali banku ka taa doo to.
21 Alla maŋ hani moo kiliŋ bula a ye ì mantoora.
A ye mansoolu dandalaa ì la kuwo la le.
22 A ko, “Ali kana n na tomboŋ moolu maa,
sako ka kuu ke n na annabiyomoolu la.”
23 Duniyaa moolu, ali suukuwo laa Yaawe ye,
Ali kankulaaroo ke luŋ-wo-luŋ, a ye kiisandiroo ke ñaameŋ.
24 Ali a la semboo niŋ waroo kankulaa bankoolu bee kaŋ,
aniŋ a la kaawakuu baalu duniyaa siyolu bee kono.
25 Yaawe warata le,
aduŋ a ñanta tentu la le famfaŋ,
ate le ñaasilaŋo ñanta wara la alloolu bee ti.
26 Kaatu moolu ye feŋolu mennu muta Alla ti,
ì mu jalaŋ kenseŋolu le ti.
Bari Yaawe le ye saŋ fatoolu daa.
27 Horomoo niŋ mansayaa waroo ye a murubeŋ ne,
semboo niŋ jusulaa le be faariŋ a taradulaa to.
28 Duniyaa siyolu, ali Yaawe jayi a la waroo kaŋ.
Ali a tentu a la semboo kaŋ.
29 Ali Yaawe too la waroo niŋ a la semboo fo,
ka horomoo dii a la.
Ali ali la sadaalu samba naŋ,
ali naa a ñaatiliŋo la.
Ali Yaawe batu a la seneyaa ñiimaa kono,
30 duniyaa moolu bee, ali jarajara a ñaatiliŋo la.
A ye duniyaa londi le, a bambanta, a te wutu la a noo to.
31 Saŋ fatoolu ye seewoo, bankoo ye kontaani.
Ì ye a kankulaa duniyaa moolu kono ko,
“Yaawe le mu Mansoo ti.”
32 Fankaasoo ye bumbuŋ, aniŋ feŋolu mennu bee be a kono.
Kunkoolu ye seewoo, ì niŋ ì fiifeŋolu.
33 Wulakono yiroolu be wuuri la le, seewoo kamma la,
ka suukuwo laa Yaawe ye,
kaatu a be naa le, ka duniyaa kiitindi.
34 Ali Yaawe tentu, kaatu a beteyaata le,
a la kanu bambaloo be tu la le fo abadaa.
35 Ali a fo ko, “Hee Yaawe, ǹ na kiisandirilaa, m̀ bondi mutoo kono,
i ye ǹ kiisa ka ǹ seyindi ka bo banku koteŋolu kaŋ,
fo ǹ si i tentu i too la kuliyaa kaŋ,
aduŋ ǹ si jusulaa ka i jayi.”
36 Tenturoo be Yaawe ye, Banisirayila la Alla,
ka bo saayiŋ na ka taa fo abadaa.
Bituŋ moolu bee ko, “Amiin,” aduŋ ì ye Yaawe jayi.
Baturoo Yerusalaamu aniŋ Kibeyoni saatewolu to
37 Wo to le Dawuda ye Asafu niŋ a mooñoolu tu Yaawe la Kambeŋ Kunewo ñaatiliŋo la, ka luŋ-wo-luŋ baturoo topatoo, 38 aniŋ Obedi-Edomu niŋ a mooñoolu, ì moo taŋ wooro niŋ seyi. Wo ye a tara Obedi-Edomu, Yedutuni dinkewo aniŋ Hosa le be marariŋ dundaŋ daalu kantoo ma.
39 A ye Piriisi Sadoki niŋ a mooñoolu tu marariŋ Yaawe batudulaa tintiŋo* la meŋ be Kibeyoni, 40 ka jani sadaa bondi Yaawe ye sadaajanidulaa* to soomandaa-wo-soomandaa aniŋ wulaara-wo-wulaara, ko a safeeta ñaameŋ luwaa to, Yaawe ye Banisirayila yaamari meŋ na. 41 Hemani niŋ Yedutuni be nuŋ ì fee le, aniŋ moo tombondiŋ toomaalu, ì ye mennu too yitandi ka tenturoo dii Yaawe la, kaatu a la kanu bambaloo be tu la le fo abadaa. 42 Hemani niŋ Yedutuni le marata footaŋolu niŋ jaawali palaatoolu la, aniŋ suukuu jooraŋ toomaalu. Yedutuni dinkewolu le tombonta ka mara dundaŋ daa ma.
43 Wo to le moolu bee seyita ì la suwolu kono, aduŋ Dawuda fanaa muruta a la suwo kono, ka neemoo daani a la dimbaayaa ye.
© Mandinka Bible © Bible Society in The Gambia, 2011
